Esmeralda Kazia, shqiptarja e parë fituese e „Cybersecurity Woman of the World”

AUSTRI — Esmeralda Kazia u shpall fituese e çmimit „Cybersecurity Woman of the World 2026”, duke u vlerësuar si gruaja më e mirë në botë në sigurinë kibernetike dhe duke u bërë shqiptarja e parë që merr këtë titull. Kazia e quajti vlerësimin „një emocion i papërshkrueshëm”, duke thënë se përfaqëson jo vetëm veten, por edhe Shqipërinë.

Ceremonia e ndarjes së çmimeve u zhvillua në Austri, në një konkurrim jashtëzakonisht të fortë. Në garë morën pjesë kandidate nga 30 shtete, ndërsa u regjistruan mbi 5 mijë nominime. Të shpallesh fituese mes kaq shumë profesionistësh, tha Kazia, është „një përgjegjësi dhe një nder i madh”.

Rrugëtimi i saj drejt sigurisë kibernetike nuk ishte një ëndërr fëmijërie, tregon Kazia. Karriera e saj mori kthesë kur u kthye në Shqipëri e më pas vazhdoi në Stamboll, ku, sipas saj, gjeti disiplinën, profesionalizmin dhe pasionin që me kalimin e viteve u kthyen në misionin e saj profesional.

Kazia u bën thirrje të rinjve shqiptarë që kanë ndërtuar karrierë jashtë vendit të mos hezitojnë të rikthehen, duke theksuar se „Shqipëria ka nevojë për ta”. Ajo thotë se do të donte të rikthehej e të kontribuonte me përvojën e fituar jashtë, në ndërtimin e institucioneve publike dhe në edukimin e brezit të ri të profesionistëve.

Për gatishmërinë ndaj kërcënimeve kibernetike, Kazia thotë se sfidat janë „gjithnjë e më të shumta dhe më komplekse”, por vlerëson se Shqipëria është më e përgatitur falë investimeve në teknologji dhe rritjes së ekspertizës. „Ndihem shumë e vlerësuar në Shqipëri,” thotë ajo, „dhe kjo më motivon edhe më shumë”.

Burim: Euronews Albania
— Redaksia ZHURMA