Dogana kap medikamente në shkallët e autobusit — vlera 6 mijë euro

PRISHTINË — Zyrtarët e Doganës së Kosovës kanë parandaluar një tentim për futjen në territorin e Republikës së Kosovës të medikamenteve të padeklaruara, të fshehura në një autobus në Pikën e Kalimit Kufitar Dheu i Bardhë, raporton Gazeta Blic. Sipas njoftimit të Doganës, gjatë një kontrolli rutinor, zyrtari doganor ka identifikuar një hapësirë të kamufluar në shkallët e autobusit.

Gjatë kontrollit të detajuar të kësaj hapësire janë zbuluar disa pako të fshehura, të cilat fillimisht dyshohej se përmbanin çaj, por pas hapjes është konstatuar se në to ndodheshin medikamente të padeklaruara. Dogana bëri të ditur se vlera e përafërt e mallit të zbuluar është rreth 6 mijë euro.

Sipas autoriteteve, para fillimit të kontrollit fizik, vozitësi i autobusit ishte intervistuar nga zyrtarët doganorë dhe kishte deklaruar se nuk posedonte mallra ose mjete monetare për t'i deklaruar pranë autoriteteve doganore. Dogana theksoi se mosdeklarimi i mallrave përbën kundërvajtje doganore në kundërshtim me dispozitat e Kodit Doganor dhe të Akcizave Nr. 08/L-247, i cili obligon çdo person që hyn ose del nga territori doganor i Republikës së Kosovës me mallra t'i deklarojë ato sipas procedurave në fuqi.

Duke pasur parasysh natyrën e mallit dhe rrethanat e rastit, autobusi është dërguar në terminalin doganor për kontroll të mëtejshëm. Procedurat janë zhvilluar në bashkëpunim me Policinë Kufitare, ndërsa pas përfundimit të ekzaminimit janë ndërmarrë veprimet e parapara me legjislacionin në fuqi, thuhet në njoftim.

Burim: Gazeta Blic — Redaksia ZHURMA