Policia kap në Shtime 21-vjeçarin e arratisur prej 3 vitesh
I riu u kap pas një ndjekjeje me veturë dhe në këmbë, pasi nuk respektoi përparësinë e këmbësorëve dhe tentoi t'u ikte hetuesve policorë.
SHTIME — Policia ka arrestuar mbrëmjen e së mërkurës në Shtime 21-vjeçarin Ahmet Sinani, i cili po kërkohej prej tri vitesh pasi ishte arratisur nga një institucion korrektues. Arrestimi i tij u krye pas një ndjekjeje të shpejtë, pasi i riu refuzoi t’i bindej urdhrit të policisë për ndalim.
Gjithçka nisi kur i riu nuk respektoi përparësinë e këmbësorëve në vendkalim. Kur policët tentuan ta ndalonin, ai shtypi gazin duke kryer tejkalime të rrezikshme mbi trotuare. Pasi hyri në rrugën pa dalje "12 Qershori", ai braktisi makinën dhe iku në këmbë, por u kap nga një hetues.
Në stacionin policor u zbulua se Ahmet Sinani kishte një urdhër-arrest aktiv. Ai ishte arratisur nga institucioni korrektues ku po vuante dënimin dhe kishte qëndruar në Itali për tre vjet. Gjatë arrestimit ai bëri rezistencë dhe pësoi lëndime të lehta, duke marrë trajtim në QKMF-në e Shtimes.
Prokurori kompetent ka marrë vendim që Ahmet Sinani të dërgohet në ndalim, ndërsa ndaj tij do të vazhdojnë procedurat e tjera ligjore. Sipas njoftimit të policisë, i riu prezumohet i pafajshëm për veprat e dyshuara derisa fajësia e tij të mos provohet me vendim të formës së prerë nga gjykata.
Burim: Sinjali
— Redaksia ZHURMA