Arratiset i burgosuri shqiptar në Greqi pas ndihmës nga persona të armatosur
Gentian Çipi u arratis gjatë transferimit nga burgu në spital, i ndihmuar nga persona të kamufluar si policë që neutralizuan eskortën nën kërcënimin e armëve.
Një arratisje spektakolare ka ndodhur gjatë transferimit të një të burgosuri shqiptar nga burgu në spital në Greqi. Ngjarja ka ndodhur rreth orës 23:30, kur automjeti i transportit ndodhej në ambientet e jashtme të spitalit, pranë repartit psikiatrik, ndërsa në të ndodheshin i burgosuri dhe dy punonjës që e shoqëronin.
Pranë automjetit janë shfaqur dy makina të ngjashme me automjetet e policisë. Personat që ndodheshin në to janë afruar dhe, nën kërcënimin e armëve, kanë neutralizuar dy shoqëruesit, duke ndihmuar më pas të burgosurin të largohej. Autorët kanë marrë me vete edhe armën e shërbimit të një punonjësi të burgut dhe janë larguar me dy automjetet duke humbur gjurmët.
I arratisuri është identifikuar si Gentian Çipi, i cili rezulton me precedentë të rëndë penalë në Shqipëri e në Greqi, ndërsa ishte arrestuar vitin e kaluar nga strukturat e Krimit të Organizuar për një çështje që lidhej me tentativë vrasjeje në Selanik.