Si ndryshon Skema Kombëtare e Mbështetjes në Bujqësi për 2026?
Çfarë masash dhe afatesh duhet të dinë fermerët që aplikojnë për skemën e re 5,2 miliardë lekëshe?
TIRANË — Fermerët dhe subjektet bujqësore kanë afat deri më 26 qershor për të aplikuar online në platformën e-Albania për 12 masat e Skemës Kombëtare të Mbështetjes në Bujqësi 2026, njofton Agjencia për Media dhe Informim (MIA).
Masat direkte mbulojnë tufën bazë të matrikulluar të gjedhit dhe të imtave, bletarinë, dosa dhe paradosa, kontrollin biologjik në serra, fermat organike, certifikimin Global G.A.P., sipërfaqet e mbjella dhe ripopullimin e peshkimit në ujërat e brendshme. Masat e investimit përfshijnë fermerë të rinj, ndërtim dhe rikonstruksion stanesh, pajisje, makineri dhe mjete për modernizim.
Skema për 2026 është hartuar pas konsultimeve me fermerët në të gjithë vendin dhe kombinon pagesa direkte me grante investimesh, me një fond total prej 5,2 miliardë lekë. Synimi kryesor është përfshirja e më shumë fermave të vogla përmes uljes së pragjeve minimale dhe rritjes së mbështetjes financiare.
Në blegtori, mbështetja për gjedhin rritet në 12 mijë lekë për krerë, me prag minimal që bie nga 10 në 5 krerë. Për të imtat, financimi shkon në 1 500 lekë për krerë dhe pragu zbret nga 100 në 50 krerë. Për herë të parë, skema financjon dosat dhe paradosat me 7 mijë lekë për krerë, për fermat me të paktën 5 krerë. Bletaria përfiton 20 mijë lekë për zgjua, me kriter minimal që ulet nga 50 në 25 koshere.
Për sipërfaqet e mbjella, fermerët me mbi 3 hektarë do të marrin 10 mijë lekë për hektar për të gjitha kulturat. Një komponent i ri kompenson 10% të vlerës së autofaturës për produktet bujqësore dhe blegtorale të shitura me faturë nga grumbulluesit ose agroturizmat.
Burim: ATSH
— Redaksia ZHURMA