Çfarë ka trashëguar kampioni Jurgen Hakani nga babai i tij legjendë?

STOCKHOLM — Jurgen Hakani nuk e njohu Suedinë si destinacion pushimi, por si fushë sfide. Pesë vite larg Tiranës, kampioni shqiptar i powerlifting-ut rrëfen për ABC e Mëngjesit si emigrimi, humbja dhe filozofia e babait e kanë formuar çdo rekord të arritur larg vendlindjes.

Prej pesë vitesh Hakani jeton në Suedi, ku punon si trajner në një nga palestrat më të njohura të vendit. Malli për shtëpinë nuk ka ikur. "Malli për familjen, Tiranën dhe shoqërinë mbetet gjithmonë. Ka vite që jam larg dhe e ndiej çdo ditë", rrëfen ai.

Ndryshimi mes dy vendeve, sipas tij, qëndron te kultura sportive. "Këtu sporti trajtohet ndryshe. Ka një kulturë të madhe jo vetëm në stërvitje, por edhe në ushqyerjen e pastër, pa hile. Kjo është shumë e rëndësishme për çdo sportist", thotë Hakani, i cili e gjen veten mirë në sportin suedez.

Rrugëtimi i tij nisi në moshën 14-vjeçare me atletikën dhe hedhjen e diskut, duke arritur deri në aktivitete ndërkombëtare për të rinjtë. Tragjedja erdhi në moshën 22-vjeçare: humbja e babait, sportistit të njohur Mirjan Hakani. Pas kësaj periudhe të vështirë, Jurgen iu përkushtua bodybuilding-ut.

Emigrimi e detyroi të bënte pauzë të gjatë nga sporti. "Emigrimi është shumë i lodhshëm në fillim. Duhet të integrohesh, të mësosh gjuhën dhe të ndërtosh jetën nga e para. Edhe pse njihja disa gjuhë të huaja, suedishtja ishte një sfidë krejtësisht e re", kujton ai. Pastaj erdhi powerlifting-u.

Në Suedi Hakani zbuloi potencialin e tij të vërtetë. "Bodybuilding-un e kam mbyllur. Këtu pëlqehen më shumë sportet e forcës dhe unë iu përkushtova plotësisht powerlifting-ut", shpjegon ai. Dhjetë vite pas ndarjes nga jeta të Mirjan Hakanit, figura e babait mbetet udhërrëfyesi kryesor.

"95 për qind e teknikës sime është e babait", pranon Jurgen, duke shtuar se shumë njerëz habiten kur e shohin si stërvitet. Nga babai ruan edhe këshillën e thjeshtë: "Shumëzoje çdo gjë me zero." Një filozofi që e mban si kampion edhe sot, larg Shqipërisë.

Burim: ABC News
— Redaksia ZHURMA