Gjenden mbetjet që dyshohet se i përkasin turistit belg Mark Joris
Policia kufitare e Maqedonisë së Veriut zbuloi sendet e 72-vjeçarit pranë liqenit të Podgoreçit; një telefon u identifikua përmes kodit IMEI.
LIBRAZHD — Mbetje mortore dhe sende personale që dyshohet se i përkasin turistit belg, Mark Joris, i cili ishte zhdukur që prej shtatorit të vitit 2024, janë gjetur në brezin kufitar. Zbulimi i fundjavës së kaluar mund t'i japë fund misterit dyvjeçar rreth fatit të 72-vjeçarit që humbi kontaktet gjatë një ecjeje malore.
Operacioni i kërkimit u zhvillua nga policia kufitare e Maqedonisë së Veriut në një shpat të thepisur malor. Zona e kërkimit shtrihej mes pikës kufitare E33, e njohur si Black Stone, dhe liqenit të Podgoreçit. Policia gjeti pranë mbetjeve një çantë shpine, tendën, thesin e gjumit, një këpucë mali, një kapele dhe dy telefona celularë.
Megjithëse analizat zyrtare të ADN-së ende nuk kanë përfunduar, autoritetet kanë arritur të identifikojnë pronësinë e sendeve të gjetura. Njëri prej telefonave celularë u verifikua përmes numrit unik IMEI, i cili përputhet plotësisht me kodin e pajisjes së Mark Joris. Ky zbulim ka përforcuar dyshimet se mbetjet i përkasin pikërisht alpinistit belg.
Turisti ishte nisur më 11 shtator 2024 nga Peshkopia për të përshkuar itinerarin e njohur High Scardus Trail, që lidh kufijtë e Shqipërisë, Kosovës dhe Maqedonisë së Veriut. Kontaktet e fundit me të u humbën më 15 shtator të atij viti. Familjarët e tij patën udhëtuar drejt zonës për kërkime, duke kaluar pranë vendit të ngjarjes.
Mark Joris jetonte në Mortsel të Belgjikës dhe njihej si alpinist i pasionuar. Para pensionimit, ai kishte shërbyer si trombonist në Brussels Philharmonic dhe kishte udhëhequr orkestrën e Edegem e fanfarën në Borgerhout. Autoritetet tani pritet të konfirmojnë zyrtarisht identitetin e mbetjeve vetëm pas përfundimit të analizave të ADN-së.
Burim: Shekulli
— Redaksia ZHURMA