Çfarë fitoi diaspora me refuzimin e nismës së SVP-së?

BERNË — Iniciativa e SVP-së "Kundër Zvicrës 10 milionëshe" u refuzua nga popullsia zvicerane në votimin e së dielës. Florim Kadriu, sindikalist dhe aktivist socialdemokrat me prejardhje shqiptare, e vlerësoi këtë si "një betejë të rëndësishme politike" kundër nxitjes së frikës dhe narrativave përçarëse të partisë së djathtë.

"Narrativat dhe nxitja e frikës u përballën me realitetin dhe unitetin e shoqërisë sonë," deklaroi Kadriu për albinfo.ch. Ai theksoi se politika e frikësimit e SVP-së mori "një përgjigje të qartë nga popullata" dhe shtoi se Zvicra ka nevojë për mbrojtjen e pagave, marrëveshjet bilaterale me BE-në dhe një sistem funksional të rregullave ndërkombëtare.

Në deklaratën e tij, Kadriu falënderoi veçanërisht aktivistet dhe aktivistët e sindikatës Unia, diasporën shqiptare dhe atë migrante, si dhe kolegët politikanë shqiptaro-zviceranë për bashkëpunimin mbipartiak që çoi në këtë rezultat. Falënderimi i posaçëm për komunitetin shqiptar vë në pah rolin aktiv të mërgatës në jetën politike zvicerane.

Megjithatë, Kadriu theksoi se duhet t'i marrim seriozisht shqetësimet e popullatës. "Qiratë e larta dhe mbingarkesa e sistemit janë probleme që duhet të trajtohen," tha ai. Sipas tij, migrantët "japin një kontribut shumë të vlefshëm" në shoqërinë zvicerane, prandaj refuzimi i nismës ishte "vendimi i duhur."

Me refuzimin e nismës "Kundër Zvicrës 10 milionëshe", vendi evropian shmang një kthesë të rrezikshme ksenofobike në politikën e migracionit. Për komunitetin shqiptar në Zvicër, rezultati është një vërtetim se angazhimi politik i mërgatës mund të ndikojë drejtpërdrejt në vendimet që i prekin familjet dhe komunitetet migrante.

Burim: Albinfo.ch
— Redaksia ZHURMA