Bashkia e Lezhës sekuestron gazebot pa leje në plazh

LEZHË — Autoritetet në Lezhë kanë vijuar aksionin për lirimin e hapësirave publike në zonën e bregdetit, ku gjatë ditës së sotme janë sekuestruar disa gazebo të vendosura pa leje. Ndërhyrja vjen pas kontrolleve të vazhdueshme që po kryhen përgjatë plazheve gjatë këtij sezoni turistik.

Kryetari i bashkisë së Lezhës, Pjerin Ndreu, ka reaguar pas këtij aksioni, duke theksuar se sekuestrimi i strukturave nuk është zgjedhja e parë e institucioneve lokale. Sipas tij, kjo masë e fundit zbatohet vetëm pasi janë ezauruar të gjitha mundësitë e tjera për respektimin e ligjit.

Ndreu shtoi se shkelja e vazhdueshme e ligjit dhe mosreflektimi pas paralajmërimeve të përsëritura mbeten veprime të pakuptueshme dhe të pajustifikueshme. Sipas tij, vendosja e sekuestros bëhet e pashmangshme për bashkinë vetëm kur çdo mundësi tjetër për të respektuar ligjin është shpërdoruar nga subjektet private.

Burim: ATSH
— Redaksia ZHURMA